Colégio São Francisco de Assis hahu existe iha 1986 iha Fatuberliu desde tempu okupasaun Indonesia. Inícia ho Ensino Pré-Secundaria (SMP). Maske Ensino Básico Pre-Secundaria deit, maibé estudante ne’ebé tama iha laran mai husi Distrito hotu iha Timor. Tamba iha mós internatu feto no mane nian ne’ebé bele atende fatin hela nian ba estudantes ne’ebé mai husi dook. Responsável ba eskola no internato ne’e mak Frei Franciskanu no Madres Franciskana sira. Situasaun politiku tempu ne’ebá ejiji atu ema tenke buka dunik Internatu. La’ós deit ho razaun atu eskola maibé mós atu bele hetan siguransa ba nia moris no mós estuda ho hakmatek. Prosesu aprendizajen la’o kuntinua to’o 1999 ema sunu eskola.

Tinan 1999-2000, Profesores no Franciskanu sira sinte eskola ne’e tenke hahú fali. Sira hahú ho fatin no material aprendizajen hirak ne’ebé simples teb-tebes. Tinan 2002 ami hahú buka hadi’a kada etapa to’o nia kondisaun agora. Liu tiha situasaun ne’e, estudantes barak liu tan mai husi Distrito seluk hakarak eskola iha Colégio ne’e no hela iha asrama. Maibé wainhira remata ona ensino Pré-Secundária sira barak fila ba Dili kuntinua Ensino Secundária. Barak husi sira ne’e la konsege remata Ensino Secundária tamba kondisaun politika nasaun nian ne’ebé ladun harmonia no mós ambiente sira hela ba, la garantia. Ho razaun oi-oin ne’ebé iha, Franciskanu sira hanoin loke Ensino secundária Katolika ida iha rai Fatuberliu hodi responde estudante sira nia nesesidade estuda.

Ensino Secundario São Francisco de Assis hahú loke iha tinan 2006. Eskola ne’e loke ho nia objectivu responde nesesidade edukasaun Fatuberliu mós colégio oan sira nian, ne’ebé sempre halai ba Dili wainhira remata Ensino Báziku (SMP) iha Fatuberliu. Razaun ne’ebé sira uja mak “ba buka escola Katólika ne’ebé kualidade di’ak.” Husi observasaun ne’ebé ami hetan mak; estudante barak susesu maibé barak la oituan mós lakon iha dalan klaran iha nia prosesu edukasaun. Balun tama eskola públiku iha Dili maibé wainhira hasoru problema oi-oin iha Dili sira halai fila mai Fatuberliu. Konfiltu oi-oin ne’ebé mosu iha Dili sempre fó afeta mós ba edukasaun, liu-liu ba foin sa’e sira ne’ebé asessu hela edukasaun iha nivel baze to’o Secundária.Iha momentu ne’ebá ho hanoin simples; ami hakarak hola parte iha problema Nasaun nian hodi rezolve nesesidade baze edukasaun ba foin sa’e sira, hamenus mós movimento urbanizasaun husi rural ba sidade ne’ebé interompe ba prosesu dezenvolvimentu nasionál. Fransikanu sira loke eskola Ensino Secundário Katólika ida iha rai Fatuberliu ne’ebé existe to’o oras ne’e.

Sistema edukasaun no prosesu iha tempu ne’ebá mós la fasil. Ami koko atu hetan rekomendasaun no apoiu husi Edukasaun Distrital maibé la konsege tamba Governu la aseita loke tan eskola foun. Fundasaun São Paulo mós la fó autorizasaun. Dalan atu bele hetan legalizasaun ba eskola ne’e, mak buka doadores no Benefisiáriu husi fatin seluk. Ho mós tulun husi ulun Boot Ordo Fransiskanu nian, ha’u hetan oportunidade ba hasoru eskola balun iha Austrália atu tulun prosesu edukasaun iha Fatuberliu Assisi. Iha fulan Abril 2006 Visita amizade ida ba eskola belun iha Austrália Padua College Brisbane-Austrália, no ami halo akordo serbisu hamutuk. Akordo ami halo atu serbisu hamutuk entre eskola rua. Akordo ne’e iha hela eskola, katak sira prontu atu ajuda ami iha parte finanseira, equipamentus eskola nian balu, ajuda mós atu halo estuda komparativu permanente entre eskola rua ne’e. (to’o oras ne’e sei la’o nafatin).

Eskola ne’e hasoru dezafius oi-oin, relasiona ho nia kondisaun aprendizajen. Profesores fou-foun mai husi Amu Lulik no Madre sira serbisu hamutuk ho profesores sira ne’ebé kapable iha sira nia area estuda, ami husu mós tulun husi eskola viñu sira. Neneik-neineik ami hetan Profesores kontratadu husi Governu ba parte dahuluk nian iha Mestre nain 7 (Mstra. Aurita, Mdr. Teodora. FSGM, Mdr.M. Veroni. FSGM, Br. Nicolau, OFM., Mstra. Marita 0rnai Lopes, Mstre. Henrique da Costa Silva, no Mstre. Yohanes Kumanireng) ne’ebé ikus mai balun muda tia ba fatin seluk. Mestre sira seluk hetan pagamentu husi estudante sira nia vensimentu mensal nian.Iha tinan 2006 Eskola hetan rekoñesimentu husi Governu RDTL ne’ebé Ministro Armindo Maia mak lidera. Hetan Aprovasaun husi Vice Ministra da Edukasaun. No hahú husi tempu ne’eba to’o oras ne’e prosesu aprendizajen la’o hanesan eskola seluk. Profesores, equipamentos oi-oin hanesan: Livrus, Mezas, kadeiras, konsesões no seluk tan mai husi Governu.